अजमल अन्सारी
सुनसरी । सुनसरी जिल्ला पछिल्लो समय गाँजा तस्करीको ट्रान्जिट बिन्दुका रूपमा चिनिन थालेको छ। पहाडी जिल्लाबाट उत्पादन गरिएको गाँजा सुनसरी हुँदै देशका विभिन्न भाग र भारतसम्म तस्करी हुने गरेको पाइएको छ।
गाँजा तस्करीले जिल्लाको नाम मात्र बदनाम गरेको छैन, समाजमा पनि नकारात्मक असर पारेको छ । गाँजा तस्करी नियन्त्रणका लागि नेपाल प्रहरी र सशस्त्र प्रहरी बलले रातदिन नभनी गस्ती, चेकजाँच तथा निगरानी बढाएका छन्। नियमित रुपमा गाँजा बरामद भइरहेको छ भने तस्कर पनि पक्राउ पर्ने क्रम जारी छ।
जिल्ला प्रहरी कार्यालय सुनसरीका प्रमुख प्रहरी उपरीक्षक सुमन कुमार तिम्सिनाका अनुसार तस्करहरु फरक–फरक प्रविधि र बाटो प्रयोग गरेर गाँजा ओसारपसार गर्ने प्रयास गरिरहेका छन्। "हामी दिनरात खटिएका छौं, गाँजा तस्करी नियन्त्रण गर्न सबै निकाय एकजुट भएर लाग्नु जरुरी छ," वहाँले भन्नुभयो।
स्थानीय तथा नागरिक समाजले गाँजाले युवामा गलत लत बसाउने, समाजमा अपराध बढाउने र समग्र जिल्लाको छवि धमिल्याउने काम गरिरहेको बताउँछन्। सामाजिक अगुवाहरुले पनि गाँजा तस्करी रोक्न थप कडाइ र सचेतनामूलक कार्यक्रम आवश्यक रहेको बताएका छन्।
सुनसरी जिल्लाका मुख्य नाकाहरु, पुल, राजमार्ग र गोप्य बाटोहरुमा प्रहरीको विशेष चेकजाँच जारी छ। प्रहरी स्रोतका अनुसार पछिल्लो एक महिनामा मात्र हजारौं केजी गाँजा बरामद गरिएको छ।
समाजमा गाँजाको बढ्दो प्रयोग र तस्करी नियन्त्रणमा कडाइ गर्न स्थानीय प्रशासन, सुरक्षा निकाय र नागरिक समाजबीच समन्वय आवश्यक देखिएको छ।
