पूर्वी चीनका एक व्यक्तिले हाङझाउको रान्यान जिममा तीन सय वर्षको मेम्बरसिपका लागि ८ लाख ७१ हजार २७३ युआन (एक लाख २० हजार अमेरिकी डलर) भन्दा धेरै खर्च गरे। तर पैसा फिर्ता माग्दा जिमका मालिक र कर्मचारी बेपत्ता भएको भन्दै उनले मुद्दा दायर गरेका छन्।
जिन नामका ती व्यक्तिले टेलिभिजन स्टेसनको सहयोगमा जिमको पर्दाफास गरे। उनले जिमसँग २६ सम्झौता गरी एक हजार २०० प्रशिक्षण सत्र र तीन सय वर्षको मेम्बरसिप किनेका थिए। ‘मे १० देखि जुलाई ९ सम्म मैले ८ लाख ७१ हजार २७३ युआन खर्च गरें,’ उनले भने।
जिनले तीन वर्षदेखि सो जिममा कसरत गरिरहेका थिए। मे ९ मा एक कर्मचारीले पुराना ग्राहकका लागि विशेष अफर भएको बताए। जिमले ८ हजार ८८८ युआन (एक हजार २०० अमेरिकी डलर) मा एक वर्षे मेम्बरसिप बेचेपछि नयाँ ग्राहकलाई १६ हजार ६६६ युआन (२ हजार ३०० अमेरिकी डलर) मा बेच्ने र बाँकी नाफा ग्राहकलाई दिने दाबी गरेको थियो।
सुरुमा शंकालु भए पनि कर्मचारीको ‘दुई महिनाभित्र बिक्री नभए पैसा फिर्ता’ भन्ने आश्वासनमा जिनले १७ हजार युआन (२ हजार ४०० अमेरिकी डलर) मा दुई मेम्बरसिप किने। पछि, कर्मचारीहरूले उनलाई थप मेम्बरसिप र प्रशिक्षण सत्र किन्न प्रेरित गरे। एकपटक उनले ३ लाख युआन (४२ हजार अमेरिकी डलर) खर्च गरे।
जुलाई १५ मा फिर्ता पाउनुपर्ने पैसा नआएपछि उनले सोधपुछ गरे। कर्मचारीले ‘आर्थिक विभागले समीक्षा गरिरहेको’ जवाफ दिए। तर, जुलाई अन्त्यमा जिमका मालिक र कर्मचारी सबै बेपत्ता भए।
झेजियाङ टिभीका अनुसार हाङझाउको बिन्जियाङमा रहेको जिम अझै खुला छ, तर केवल रिसेप्सन र प्रशासनिक कर्मचारी छन्। सम्झौताहरूमा नाफाको वाचा उल्लेख थिएन र मेम्बरसिप हस्तान्तरण गर्न नमिल्ने थियो।
‘मलाई ठगियो, तर म पैसा फिर्ता पाउन नजिक थिएँ जस्तो लाग्यो,’ जिनले भने। उनले यो खर्चलाई ‘स्वास्थ्यप्रति प्रतिबद्धता’ मानेका थिए। ‘म तीन सय वर्षसम्म यो प्रयोग गर्छु भन्ने सोच्दिन, यो मेरो स्वास्थ्यप्रतिको लगानी थियो,’ उनले थपे।
यो घटनाले सामाजिक सञ्जालमा हलचल मच्चाएको छ। ‘उनले आफ्ना नातिनातिनाका नातिनातिनाहरूका लागि मेम्बरसिप किने,’ एकजनाले हाँसे। अर्काले भने, ‘सम्पत्ति र बुद्धि नमिल्दा पैसा कुनै न कुनै रूपमा हराउँछ।’
