सुनसरी। सुनसरीको हरिनगर गाउँपालिका–२ भुटाहा क्षेत्रमा सशस्त्र प्रहरीले २४ किलो गाँजासहित एक मोटरसाइकल नियन्त्रणमा लिएको छ।
सशस्त्र प्रहरी बल नेपाल बिओपी बसन्तपुरबाट खटिएको टोलीले शुक्रबार राति विशेष चेकजाँचका क्रममा प्रदेश १–०२–०५८ प १४९ नम्बरको पल्सर मोटरसाइकल नियन्त्रणमा लिएको हो। प्रहरीका अनुसार मोटरसाइकलमा अवैध रूपमा ओसारपसार गरिँदै गरेको करिब २४ किलो गाँजा बरामद गरिएको छ।
प्रहरी टोलीलाई देख्नासाथ मोटरसाइकल चालक फरार भएको बताइएको छ। घटनास्थलबाट बरामद गाँजा र मोटरसाइकललाई नियन्त्रणमा लिएर थप अनुसन्धान प्रक्रिया अघि बढाइएको सशस्त्र प्रहरीले जनाएको छ।
सीमावर्ती क्षेत्रमा लागूऔषध ओसारपसार नियन्त्रणका लागि सशस्त्र प्रहरीले निगरानी र चेकजाँचलाई तीव्र बनाएको जनाएको छ। फरार चालकको खोजी भइरहेको तथा घटनाबारे थप अनुसन्धान जारी रहेको प्रहरीले जनाएको छ।
