सुनसरीको धरान उपमहानगरपालिका–४ सर्दु जलाधार क्षेत्रबाट प्रहरीले २७५ केजी गाँजासहित एक युवकलाई पक्राउ गरेको छ । इलाका प्रहरी कार्यालय धरानका डीएसपी भीषणबाबू राईका अनुसार गागुरीगडी–८ का २१ वर्षीय दिवसन राईलाई आइतबार राति पक्राउ गरिएको हो ।
राई धनकुटाबाट भारी मात्रामा गाँजा बोकेर धरानतर्फ झर्दै गरेको अवस्थामा नियन्त्रणमा लिइएको प्रहरीले जनाएको छ । पक्राउ परेका राईलाई इलाका प्रहरी कार्यालय धरानको हिरासतमा राखी आवश्यक कानुनी कारबाही अघि बढाइएको डिएसपी राईले जानकारी दिए।
यसैबीच, कोशी गाउँपालिका–७ स्थित पूर्व–पश्चिम राजमार्गको सडक किनाराबाट प्रहरीले बेवारिसे अवस्थामा १८ बोरा गाँजा बरामद गरेको छ । अस्थायी प्रहरी चौकी हरिपुरबाट खटिएको गस्ती टोलीले आइतबार ६३७ किलो ४५ ग्राम गाँजा फेला पारेको जिल्ला प्रहरी कार्यालय सुनसरीका डीएसपी योगराज खतिवडाले बताए । प्रहरीले गाँजा ओसारपसारमा संलग्न व्यक्तिहरुको खोजतलास तीव्र बनाएको जनाएको छ ।
यता, उदयपुरको अस्थायी प्रहरी पोष्ट नेपालटारबाट खटिएको टोलीले चेकजाँचको क्रममा सिराहा लहान नगरपालिका–१७ की ३५ वर्षीया लिला देवी राम र लहान–८ की ३० वर्षीया अस्मिता रामलाई क्रमशः ६ किलो ८४६ ग्राम र ५ किलो ६ ग्राम गाँजासहित नियन्त्रणमा लिएको छ । उनीहरूलाई पनि आवश्यक अनुसन्धानका लागि हिरासतमा राखिएको प्रहरीले जनाएको छ ।
