इनरुवा । भोक्राहा नरसिंह गाउँपालिका-४ स्थितमा रहेको सप्तकोशी न्युरो अस्पतालमा तलब नपाएको भन्दै कर्मचारीहरुले तालाबन्दी गरेका छन् ।
नयाँ सञ्चालक टिमले जिम्मेवारी सम्हाल्नु अघिनै अस्पतालमा देखिएको विवादका कारण शुक्रबार अपराह्नदेखि कर्मचारीहरुले अस्पतालको प्रशासनिक कार्यकक्ष तथा गेटमा तालाबन्दी गरेका हुन् ।
कर्मचारीहरुले तलब नपाएको र व्यवस्थापनले पटक-पटक आश्वासन दिँदै समयमै समस्या समाधान नगरेको भन्दै विरोधमा उत्रिएका हुन् । अस्पतालका कर्मचारीहरुले व्यवस्थापनको बेवास्ताका कारण काम गर्न गाह्रो भएको भन्दै आफ्ना माग पुरा नभएसम्म तालाबन्दी जारी राख्ने बताए ।
यता अस्पताल व्यवस्थापन पक्षले नयाँ सञ्चालक टिम आउन लागेको र आर्थिक व्यवस्थापनको काम अन्तिम चरणमा रहेकाले छिट्टै समस्या समाधान हुने जनाएको छ ।
हाल अस्पतालको आकस्मिक सेवा भने सुचारु गरिएको जनाइएको छ ।
