मोहम्मद अफताब हासमी
भारतबाट अवैध रुपमा भित्र्याइएको लत्ता कपडा, खाद्य पदार्थ र मोटरसाइकल सहितको मालसामान इलाका प्रहरी कार्यालय राजपुरले नियन्त्रणमा लिएको छ।
शुक्रबार दिउँसो करिब ३ बजे इलाका प्रहरी कार्यालय राजपुरमा प्राप्त विशेष सूचनाका आधारमा प्र.ब.ह. मनोज कुमार यादवको कमाण्डमा खटिएको प्रहरी टोलीले ईशनाथ नगरपालिका वडा नं. ४ लतमरी टोल स्थित बाँस घारीमा लुकाइ छिपाई राखिएको मालसामान बरामद गरेको हो।
बाँस घारीको परालले छोपी राखिएको अवस्थामा फेला परेको ती सामग्रीहरू मध्ये युरिया मल ४ बोरा, चिनी २५ किलो, रिफाइन्ड तेल ७ लिटर, चकलेट ३ प्याकेट, लुङ्गी १८ थान, साडी २९ थान र नम्बर प्लेट नभएको एक थान मोटरसाइकल रहेका छन्।
प्रहरीले सम्पूर्ण सामग्री र मोटरसाइकल आवश्यक अनुसन्धान तथा कारवाहीका लागि सम्बन्धित निकायमा पठाएको छ। यसबारे थप अनुसन्धान जारी रहेको इलाका प्रहरी कार्यालय राजपुरले बताएका छन्।
