अजमल अन्सारी
सुनसरी । खेलकुद गतिविधि मार्फत युवामा सकारात्मक ऊर्जा र सामाजिक सद्भाव सृजना गर्ने उद्देश्यले सुनसरीको भोक्राहा नरसिंह गाउँपालिका–४ जनता चौकस्थित प्रथम भोक्राहा नरसिंह प्रदेशस्तरीय नकआउट कबड्डी प्रतियोगिता आयोजना हुने भएको छ।
जनता युवा क्लबको आयोजना र भोक्राहा नरसिंह गाउँपालिका, हरिनगर गाउँपालिका र कोशी गाउँपालिका तथा कोशी प्रदेश पर्यटन, वन तथा वातावरण मन्त्रालयको विशेष सहयोगमा जेष्ठ ९ गतेदेखि ११ गतेसम्म सञ्चालन हुने प्रतियोगितामा प्रदेशभरका १० वटा कबड्डी टोलीहरू प्रतिस्पर्धामा उत्रिने क्लबका अध्यक्ष हैदर अलिले पत्रकार सम्मेलन मार्फत जानकारी दिएका छन्।
उनका अनुसार प्रतियोगिताको सम्पूर्ण तयारी अन्तिम चरणमा पुगेको छ। "प्रदेशस्तरीय प्रतियोगिता यस क्षेत्रमै पहिलोपटक हुन लागेको हो। यसले स्थानीय खेलकुदको विकास मात्र नभई सामाजिक एकता र भाइचारा प्रवर्द्धनमा समेत योगदान पुर्याउने विश्वास लिएको छौं," अध्यक्ष अलिले बताए।
प्रतियोगिताको उद्घाटन समारोह कोशी प्रदेश सभा सदस्य हाजी इस्राइल मन्सुरी र भोक्राहा नरसिंह गाउँपालिकाका अध्यक्ष अजमल अखतर आजाद मिया, हरिनगर गाउँपालिकाका अध्यक्ष हाजी गफार अन्सारी, कोशी गाउँपालिकाका अध्यक्ष ऐयुब अन्सारीसहित विभिन्न राजनीतिक, सामाजिक र खेल क्षेत्रका विशिष्ट व्यक्तिहरूको उपस्थितिमा भव्य रूपमा उद्घाटन गरिने आयोजकले जनाएको छ।
तीनदिने प्रतियोगितामा उत्कृष्ट प्रदर्शन गर्ने टिम तथा खेलाडीलाई नगद पुरस्कारसहित ट्रफी, मेडल र प्रमाणपत्र प्रदान गरिनेछ। प्रथम पुरस्कार ६० हजार र दोस्रो पुरस्कार ४० हजार रहेको आयोजकले जनाएको छ ।
आयोजकका अनुसार प्रतियोगितालाई भव्य र व्यवस्थित बनाउन स्थानीय युवा समूह, सुरक्षाकर्मी र स्वयंसेवकहरूको सक्रिय सहभागीता रहनेछ। खेलप्रेमी तथा स्थानीय बासिन्दालाई प्रतियोगिता अवलोकन र प्रोत्साहनका लागि उपस्थित हुन समेत आग्रह गरिएको छ।
पत्रकार सम्मेलनमा सुनोज निराैला र सजिलो कृषि सहकारी संस्थाका अध्यक्ष तथा भोक्राहा नरसिंह कबड्डी टिमका प्रबन्धक जमालुद्दीन मन्सुरी लगायतका सरोकारवालाहरुको उपस्थित रहेको थियो ।
ट्रफी अनावरण तथा जर्सी सार्वजनिक
यसैबीच भोक्राहा नरसिंह गाउँपालिकामा आयोजना हुने कबड्डी प्रतियोगिताको ट्रफी अनावरण तथा स्थानीय टिमको जर्सी सार्वजनिक गरिएको छ।
ट्रफी अनावरण तथा जर्सी सार्वजनिक कार्यक्रमका प्रमुख अतिथि गोरखापत्र दैनिकका इनरुवा समाचारदाता जयकृष्ण यादवले कबड्डीजस्तो परम्परागत खेललाई संरक्षण र प्रवर्द्धन गर्न यस्ता प्रतियोगिता अत्यन्तै आवश्यक रहेको बताउनुभयो। "स्थानीयस्तरमै खेलकुद गतिविधि बढ्दै जानु सकारात्मक संकेत हो," यादवले भने।
